Home Leza Award Award Articles ሥምንተኛው ለዛ የሬዲዮ ፕሮግራም የአድማጮች ምርጫ ሽልማት፣ በዘጠኝ የሽልማት ዘርፎች – በቅርብ...

ሥምንተኛው ለዛ የሬዲዮ ፕሮግራም የአድማጮች ምርጫ ሽልማት፣ በዘጠኝ የሽልማት ዘርፎች – በቅርብ ቀን

5767

በሀገራችን የሙዚቃ ታሪክ እጅግ መቀዛቀዝ፣ የሙዚቃ አልበምም ህትመት መፍዘዝ፣ ፊልም ሰሪዎችም አረ ጉድ ነው የሰው ያለህ ባሉበት በዚያ ወቅት እንደ አንድ የኪነጥበብ አባልና የሚዲያሰው የበኩላችንን አስተዋጾ ለማበርከትና አድማጭ ተመልካቹን ባገኘነው አጋጣሚ ሁሉ ለማነቃቃት በማሰብ ነበር  በሸገር ኤፍ ኤም 102.1 የለዛ የአድማጮች ምርጫ ሽልማት ስነስርዓት የተጀመረው፤ ከዚህ ባለፈ ምንም እንኳ በሀገራችን ብዙ አስርት አመታት ያስቆጠረ ባህላዊም ሆነ ዘመናዊ የኪነጥበብ ልማድና ስራ ቢኖረንም ቅሉ እነኚህን የኪነ ጥበብ ሰዎችና ስራዎች ተከታትሎ በተገደበ የጊዜ ኡደት እውቅና የሚሰጥ ቋሚ ተቋም ባለመኖሩ ምክኛት ለምን እኛ የቻልነውን አናደርግም የሚልም ነበር ሌለኛው የመነሻ ሃሳባችን፣ የኪነጥበብ ሰውች በአመት አንድ ጊዜ ተገናኝተው ቢጨዋወቱስ ሸጋ አይደለምን?  የሚለው ጥያቄም አይዘነጋም።
እነዚህን ዋነኛ ገፊ ምክንያቶች አስቀድሞ በ2003 ዓ.ም የአመቱ ምርጥ ነጠላ ዜማ፣ ምርጥ ተዋናይት፣ የአመቱ ምርጥ ተዋናይ፣ የአመቱ ምርጥ ፊልምና የአመቱ ምርጥ አልበም በሚሉ አምስት ዘርፎች የመጀመሪያው በሸገር ኤፍ.ኤም 102.1 የለዛ ሬዲዮ ፕሮግራም የአድማጮች ምርጫ ሽልማት ስነስርዓት በሚል ስያሜ የሀገራችን የኪነጥበብ ሰዎች በተገኙበት በደማቁ ተካሄድ፤ ዘሪቱ ከበደ አርተፊሲያል በሚለው ነጠላ ሙዚቃዋ፣  ሰሃር አብዱልከሪም ያንቺው ሌባ በተሰኘ ፊልም ላይ ባሳየችው ትወና፣ ጋሽ አበበ ባልቻ በሄሮሺማ፣ ራሱ ሄሮሺማ ደግሞ በምርጥ በፊልምነቱ፣ ናትናኤል (ናቲ ማን) በመጀመሪያው አልበሙ በየ ውድድር ዘርፎቹ የመጀመሪያዎቹ አሸናፊዎች ሆነው በለዛ የታሪክ መዝገብ ላይ ሰፈሩ፤ በየአመቱ ከጥቅምት ወር ጀምሮ እስከ ሃምሌ ድረስ የሚወጡ  የኪነጥበብ ሰዎችንና ስራዎችን በአድማጮች ምርጫ አወዳድሮ እውቅና ለመስጠ በ2003ዓ.ም አንድ ያለው ለዛ፤ በ2004ዓ.ም መስከረም ወር ላይ ሁለትኛውን የጥበብ ድግስ በነዛው አምስት የውድድር ዘርፎች በተሳካ ሁኔታ ሲያካሂድ፤ ማህደር አሰፋ ምርጥ ተዋናይት በሼፉ ቁጥር ሁለት፣ ታሪኩ ብርሃኑ(ባባ) በፍቅር ኤቢሲዲ ምርጥ ተዋናይ፣ ራሱ የፍቅር ኤቢሲዲ የተሰኘው ፊልም ደግሞ የአመቱ ምርጥ ፊልም ሲሆን፣ ቴዋድሮስ ካሳሁን(ቴዲ አፍሮ) ጥቁር ሰው ብሎ የጠራው አልበሙ የአመቱ ምርጥ አልበም ተሰኝቶለታል፤ የጃሉድ ድግስ የአመቱ ምርጥ ነጠላ ዜማን ሽልማት እንዲወስድ አስችሎታል። በ2005 ዓም ለሶስተኛ ጊዜ የተካሄድው በሸገር ኤፍ.ኤም 102.1 የለዛ ሬዲዮ ፕሮግራም የአድማጮች ምርጫ ሽልማት ስነስርዓት ከቀደሙት ሁለቱ እጅግ በበዛ ድምቀት የተካሄደ ሲሆን በታዳሚም ብዛት የላቀ ነበር፤ ከአምስቱ የታወቁ ዘርፎቹ በተጨማሪ የህይወት ዘመን ተሸላሚን ዘርፍ ለመጀመሪያ ጊዜ አካቶ የተካሄደ ነበር ሶስተኛው የለዛ የአድማጮች ምርጫ ሽልማት፤ በዝግጅቱም የኛ የተሰኘው ሙዚቃ በነጠላ ዜማ ዘርፍ፣ ማህደር አሰፋ በአይራቅ ፊልም ምርጥ ተዋናይት፣ ሳምሶን ታደሰ ቤቢ በአምራን ፊልም ምርጥ ተዋናይ፣ አይራቅ የአመቱ ምርጥ ፊልም፣ የሚካኤል በላይነህ ናፍቆትና ፍቅር የአመቱ ምርጥ አልበም ተብለው ሲሸለሙ አንጋፋው የሙዚቃ ሰው ጋሽ አየለ ማሞ ደግሞ በአዲሱ የህይወት ዘመን ዘርፍ ተሸላሚ ሆነዋል፤ አራተኛው በሸገር ኤፍ ኤም 102.1  የለዛ ሬዲዮ ፕሮግራም የአድማጮች ምርጫ ሽልማት ስነስርዓት በ2006ዓ.ም የተካሄደ ሲሆን ይሄኛውም ዝግጅት ምርጥ አዲስ ድምጻዊ እና የአመቱ ምርጥ የሙዚቃ ቪዲዮ የሚሉ ሁለት አዳዲስ የሽልማት ዘርፎችን በመጨመርና የሽልማት ዘርፎቹን ወደ ስምንት በማሳደግ የተከወነ ነበር። ሩታ መንግስተዓብ በረቡኒ ምርጥ ተዋናይት፣ መሳይ ተፈራ በትመጫለሽ ብዬ ፊልም ምርጥ ተዋናይ፣ ታላቅ ወንድሙ ግርማ ተፈራ በመቼ ትመጫለሽ ሙዚቃው ምርጥ ነጠላ ዜማን፣ የስለሺህ ደምሴ (ጋሽ አበራ ሞላ) ያምራል ሀገሬ ምርጥ አልበም፣ የቅድስ ይልማ ረቡኒ የአመቱ ምርጥ ፊልም፣ ሚካኤል ለማ ደምሰው እና ጃኪ ጎሲ በፊያሜታ የሙዚቃ ቪዲዮው ሁለቱን አዳዲስ ዘርፎች ማለትም ምርጥ አዲስ ድምጻዊንና ምርጥ የሙዚቃ ቪዲዮን ሲያሸንፉ የት ዝታው ንጉስ ጋሽ ማህሙድ አህመድ ደግሞ የህይወት ዘመን ተሸላሚ ሆኖ ተጠናቋል።
ምርጥ የፊልም ማጀቢያ ሙዚቃ የሚለው አዲስ የሽልማት ዘርፍ የተካተተበት የሽልማት ዘርፎቹም ወደ ዘጠኝ ያደጉበት በይዘቱ ገዝፎ በአቀራረቡ ከመቼውም ጊዜ በላይ ደምቆ የታየው የ2007 አምስተኛው በሸገር ኤፍ ኤም 102.1 የለዛ ሬዲዮ ፕሮግራም የአድማጮች ምርጫ ሽልማት ስነስርዓት ነበር። ቴዎድሮስ ካሳሁን (ቴዲ አፍሮ) በሰባደረጃ የተሰኘው ነጠላ ሙዚቃው ምርጥ ነጠላ ዜማን፣ አኒሜትድ የሆነውና በፊቸሪንግ ጃሉድ የተሳተፈበት የዮሴፍ ገብሬ(ጆሲ) “ሽክ ብለሽ” የሚዙቃ ቪድዮ የዓመቱ ምርጥ የሙዚቃ ቪዲዮ፣ ድምጻዊ ዳን አድማሱ ምርጥ አዲስ ድምጻዊ፣ አዚዛ አህመድ በሰኔ ሰላሳ ምርጥ ተዋናይት፣ ግሩም ኤርሚያስ በላምባ ፊልም ምርጥ ተዋናይ፣ ሰኔ ሰላሳ የዓመቱ ምርጥ ፊልም፣ የአብነት አጎናፍር አስታራቂ ምርጥ አልበም፣ በአዲሱ ምርጥ የፊልም ማጀቢያ ሙዚቃ ዘርፍ ለኻረየት ፊልም ማጀቢያነት የተሰራው የጸደኒያ ገብረ ማርቆስ ሙዚቃ ተሸላሚ ሲሆን፣ ቄንጠኛው፣ የሃበሻው ጀምስ ብራውን አንጋፋው ጋሽ አለማየሁ እሸቴ የሂወት ዘመን ሽልማት ዘርፍ ተሸላሚ ሆኖ አልፎል።
ድምጻዊ ሳሚ ዳን በአራት የሽልማት ዘርፎች ታጭቶ አራቱንም ሽልማቶች የወሰደበት ስድስተኛው በሸገር ኤፍ.ኤም 102.1 የለዛ ሬዲዮ ፕሮግራም የአድማጮች ምርጫ ሽልማት ስነስርዓት ከወትሮው ልዩ ነበር፤ በዚህ ዝግጅት በምርጥ አዲስ ድምጻዊነት፣ በምርጥ የሙዚቃ ቪዲዮነት፣ በምርጥ ነጠላ ዜማነትና እንዲሁም በታላቁ ሽልማት በምርጥ የአመቱ አልበምነት የሳሚዳን ከራስ ጋር ንግግር አልበምና በውስጡ የተካተተው ባለ ቪዲዮው “ጠፋ የሚለየን” ነጠላ ዜማ በሽልማት ተንበሽብሸው አምሽተዋል፤ በተጨማሪም አዲስ አለም ጌታነህ እና ካሳሁን ፍሰሃ(ማንደላህ) ሁለቱም በሀእና ለ ፊልም ምርጥ ተዋናይትና ተዋናይ፣ የአብርሃም ገዛህኝ የነገን አልወልድም የአመቱ ምርጥ ፊልም ተብለው ሲሸለሙ ደርባባውና ዘናጩ ባለ ውብ ድምጹ ጋሽ ተሾመ ምትኩ የሂወት ዘመን ዘርፍ ተሸላሚ ሆኖል።
ሁለት ጥንዶች እጩ የሆኑበትና እውቁ ድምጻዊ ቴዎድሮስ ካሳሁን(ቴዲ አፍሮ) በሁለት ዘርፎች ታጭቶ ሁለቱንም ሽልማቶች የወሰደበት የ2009ኙ ሰባተኛው በሸገር ኤፍ.ኤም 102.1 የለዛ ሬዲዮ ፕሮግራም የአድማጮች ምርጫ ሽልማት ስነስርዓት ከቀደሙት ዝግጅቶች ሁሉ የብዙዎችን ትኩረት የሳበና የገዘፈ የሚዲያ ሽፋን ያገኘ ነበር፤ ይህም የፕሮግራሙን አዘጋጆች የጅማሬ ትልም የመታና በመላው የጥበብ ስራ ላይ ተጽእኖ መፍጠር የሚያስችል አቅም ያስገኘ አስደሳች ሁኔታ ነበር፤ በተወዳዳሪ እጦት ከአምስተኛው በሸገር ኤፍ.ኤም 102.1 የለዛ የአድማጮች ምርጫ ሽልማት ስነስርዓት አልፎ መጓዝ ያልቻለው “የአመቱ ምርጥ የፊልም ማጀቢያ ሙዚቃ” ዘርፍ ባይቀነስ ኖሮ በሰባተኛው ዝግጅት ላይ አዲስ ሆኖ የገባው ምርጥ ተከታታይ የቴለቪዥን ድራማ ዘርፍ የሽልማቱን ዓይነት ወደ አስር ያሳድገው ነበር፤ ዘመን የተሰኘው ተከታታይ የቴሌቪዥን ፊልም በአዲሱ ምርጥ ተከታታይ የቴለቪዥን ድራማ ዘርፍ፣ ትንሹ ድምጻዊ ዳዊት አለማየሁ በምርጥ አዲስ ድምጻዊ ዘርፍ፣ ብስራት ሳሙኤል “ሄድ መለስ” በተሰኛው ቪድዮ ባካተተው ነጠላ ዜማው በምርጥ የሙዚቃ ቪዲዮ ዘርፍ፣ ድምጻዊት ዘሪቱ ከበደ በታዛ ፊልም ትወናዋ በምርጥ የአመቷ ተዋናይት ዘርፍ፣ አለምሰገድ ተስፋዬ በምርጥ የአመቱ ተዋናይ ዘርፍ፣ እውቁ ድምጻዊ ቴዎድሮስ ካሳሁን (ቴዲ አፍሮ) ኢትዮዺያ ብሎ በጠራው አልበሙና ቀደም ብሎ ባወጣው የአልበሙ መጠሪ ነጠላ ዜማ በሁለቱ የውድ ድር ዘርፎች ማለትም በዓመቱ ምርጥ የሙዚቃ አልበምና በምርጥ ነጠላ ዜማ ዘርፍ፣ የቅድስት ይልማ ታዛ ፊልም በምርጥ የአመቱ ፊልምነት አሸንፈው የተዘጋጀላቸውን ሽልማት ሲወስዱ፣ የኢትዮዺያ ሙዚቃ ወርቃማ ዘመን ሁነኛ ማስታወሻና ህያው ምስክር የሆነው አንጋፋው የሙዚቃ ሰው ጋሽ ግርማ በየነ የህይወት ዘመን ተሸላሚ ሆኖ ተጠናቃል።
ለዛ ያለፉትን ሰባት አመታት ዘወር ብሎ ሲያስተውል በየአመቱ እንዲህ ያለውን የጥበብ ድግስ ማዘጋጅት ምን አድካሚ ቢሆን ከሆነ ወዲ መለስ ብለው ሲያዩት የሚያኮራ የኪነጥበብ ገጽ ሆኖ መታወቅን በክብር ተቀብሏል፤በለዛ የሰባት ዓመታት ታሪክ ድምጻዊ ሳሚ ዳን አራት ጊዜ በመታጨትና በአንድ ጊዜ አራት ሽልማቶችን በመውሰድ የቀዳሚነቱን ስፍራ ሲቀዳጅ፣ እውቁ ድምጻዊ/የዜማና ግጥም ደራሲው ቴዎድሮስ ካሳሁን(ቴዲ አፍሮ) እና ተዋናይት ማህደር አሰፋ ሁለት ሁለት ጊዜ ሽልማቶችን በመውሰድ ሳሚ ዳንን ተከትለው ይመራሉ፤ዘንድሮም ለስምንተኛ ጊዜ አመታዊ ድግሳችንን ለማሰናዳት ባጭር ከታጠቅን አነሆ ቀናት ተቆጥረዋል፣ በእስከ ዛሬው ጉዞዋችን በሞራልም ይሁን በአገልግል ስንቅ በማቀበል፣ ቀና ሀሳብ በመለገስ፣ ከጉልበትና ከዕውቀታችሁ ሳትሰስቱ ብቻ ለየዝግጅቶቻችን መድመቅ በሙሉ መንፈስ አብራችሁን ደፋ ቀና ስትሉ ለነበራችሁና/ላላችሁ የለዛ ቤተሰቦች ምስጋናችን እጅግ የከበረ ነው።
ለከንግዲሁም የለዛን አመታዊ የሽልማት መርሃ ግብር በዓለም ላይ እንደምናያቸው ያሉ ተወዳጅና ታዋቂ የኪነ ጥበብ መዘከሪያ መድረኮች ጥግ እስከናደርሰው ነውና ጉዞአችን አብሮነታችሁ አይለየን ስንል እንጉስ እልፍኝ እንደቆመ ባለሟል ለጥ ብለን እጅ እየነሳን ነው፣ በዚሁም ስምንተኛው በሸገር ኤፍ.ኤም102.1 የለዛ የአድማጮች ምርጫ ሽልማት ስነስርዓት ዝግጅት በተለመዱት ዘጠኝ የሽልማት ዘርፎች ማለትም
በ የአመቱ ምርጥተከታታይ የቴሌቪዥን ድራማ
የአመቱ ምርጥአዲስ ድምጻዊ/ት
የአመቱ ምርጥነጠላ ዜማ
የአመቱ ምርጥተዋናይት
የአመቱ ምርጥተዋናይ
የአመቱ ምርጥየሙዚቃ አልበም
የአመቱ ምርጥፊልም
የአመቱ ምርጥአልበምና
በህይወትዘመን ተሸላሚ ዘርፎች በይፋ መጀመሩን ስናበስራችሁ እጅግ ደስ እያለን ነው።
ሁላችሁም ሁላችንም  ሚና አለን!!
ብርሃኑ ድጋፌ ክብረት

1 COMMENT

LEAVE A REPLY

Please enter your comment!
Please enter your name here